Tauchen und Miami

De zweiti Tauchtag het wie de ersti erst nochem Mittag agfange. Sind uf es relativ engs Boot packt worde, alles zämemache und schwupps is Wasser. Do mer gfunde hend, dass mer au ohni Guide tauche chönd, sind mer uf eigeni Fust lostaucht. Isch ganz en interessante Tauchgang xi und au de Zweiti het vil schöni Fisch parat kah zum xeh. Do sMeer a dem Tag ganz ruhig xi isch, hend mers total chöne gnüsse. Natürli hanis mol wieder nöd chöne loh ine Füürkoralle ine z’sitze, aber da simmer üs jo gwöhnt. So isch de Tauchtag ruhig verbi gange. Bim Obigspaziergang hend üs dMoskitos vil z’gern kah, sodass mer garantiert no en Moment a de 10minütig Marsch denke werdet (nu so kurz aber mind. 10 Muggestich:-))

De dritti Tag hend mer scho am halbi 9ni ufem Tauchboot agfange. Sind bi ruhiger See uf es chlises herzigs Schiff gange, wo mer wieder üsi Sache agfange hend zämeschruube. Het üs doch de Captain vorgwarnt, dass mer bi dem Riff liecht verlore got, hend mer welle guet ufpasse wos Boot isch. Aber noch 30min tauche hend mer beid gfunde, dass sBoot mues ine anderi Richtig si. Okay, uftauche, luege, abtauche, okay…witer. Wo blibt denn das Boot? Okay, wieder ufe, nöd guet, anderi Richtig. Nocheme Wili grad us tauche hend mer es Boot gfunde, aber das het total anderst usxeh vo une. Okay, nomol luege, wieder falsch. Wo mer entli bim Boot acho sind hend üs alli usglachet und nu no uf üs gwartet, guet dass mer üs immer so einig sind. Bim Zweite Tauchgang hend mer üs denn de Weg schöö gmerkt und sBoot immer im Aug kah. Defür alles andere nöd: D’Gruppe vor üs het 4-5 Adlerroche und en ca. 2m grosse Hammerhai xeh – wo mer echt higlueget hend? Überall nu nöd döt hii. Jenu, nöchst mol denn.

De Nomitag hend mer demit verbrocht dur de Verkehr uf Miami Beach z’fahre. Sind zwor 1,5 Stund xi ein Weg, aber het sich glohnt. Hend en wunderschöne Sandstrand gfunde. Echli Models bim Fotoshooting beobachtet und echli badet, simmer wieder retour – direkt in Firobigverkehr. Echt müehsam wenn denn dezue no sNavi meint mer söllet über e Brugg fahre wo abbroche worde isch? Hends denn glich no gschafft und sind in Key Largo am Obig ines feins Restaurant go esse. Fisch und Burger. Naja einigi Überraschige hets glich no geh – woni gfroget ha wasi grad für Fisch esse hets gheisse Dolphin?!?! Ehm jo, isch fein xi,… Nenei sött glob kei Delfin xi si, aber i weiss jo au nöd. Wie scho mol verzellt wäret mer wiedermol bide Kultur vode Amis…chum leit mer sBsteck ab wennds de Teller mitneh und zmittst wäret em Esse frogets obs Dessert dörfet bringe? Nuuu kei Stress!! Wommer denn de Guetschii für de Dessert, en berüehmte iheimische Limette Cake iglöst hend, hend mer en Limettemilchshake becho, au e Lösig:-) I dem Sinn, bis es witers Mol!