Tief- und Nachttauchen

Wie bereits akündiget isch gester Tüüüf- und Nachttauche ufem Programm gstande. Am 7ni am Obig hend mer üs troffe. Alli versammlete Taucher begrüesst, Gartetisch beschlagnahmt und rasch Theorie durekätschet. Hets doch s'eint oder s'andere ide Wiederholigsfroge no geh zum ergänze. Aber Kunststück wenner mer sött Theorie mache und di andere quatschet, lachet und laufet nebet zue ume. Jedefalls nochher rasch Gepäck packt, nochli umegschnorret sind mer denn 20.30 in Goldach acho.

Goldach Rietli hend mer usgwählt für de Tüüüftauchgang. Brrr....xehts kalt us. Aber das het nöd abgschreckt...blub blub abgetaucht. Ade Kettle noh, am Gitter witer, bim Surfbrett verbi simmer richtig tüüüfste Punkt. Do de Bodesee nüme ganz so hoch isch, isch de nüme ganz so tüüf xi. Döte une hend mer nu no grad 7 Grad kah und do hani mi doch gmerkt, dassi mini Fingern nüme spüüre. Egal, uf 10m bi 13 Grad het sichs denn defür agfühlt wie ide Badwanne. Tauchgang erfüllt.

Nochere Pizzapausei de Pizzeria in Goldach sind mer ad Rampe Rorschach. Natürli isch um di säb Ziit kein Mensch meh ume xi. I meine was für komischi Käutz gönd am 11fi Z'nacht no go tauche? Isch doch sehr kalt xi vode warme Pizzeria in nasse, kalte Azug ine. Dank em Liecht im Auto hemmer gnueg xeh zum alles zämebaue und sind denn au scho wieder abtaucht. Das mol no bis 8 Meter tüüf, bim Übigsgitter verbi und nochli de Stei noh. Xeh hend mer sehr vil, Aal, ca. 50cm grosse Barsch...en Hufe anderi Fischli. Di chline freche Fischli sind ab und zue grad nu paar cm vor de Taucherbrille dure düüüset, uh herzig.

So sind mer schliesslich z'nacht am 1s retour id Tauchbasis cho, total kaputt. Aaaaaaaaaaaaber, contratulations - bestande. Advanced Open Water Diver :-) No rasch g'loggt, simmer denn rasch rasch hei is Bettli. Hettet mer wieder es Kapital erlediget, es folgt sicher bald scho es neus!

Tauche und de Summer ide Schwiiz

Sola do bini wieder mol. Mol luege, wer das no so lese tuet, ez wo di spannende Ferie verbi sind und mer wieder retour im Alltag sind.

I mues säge, i vermisse di warme Temperature us de USA scho. Wobi ide Nochrichte het mer glese, dass in Florida en Wirbelsturm underwegs isch und dLüüt vom Strom abgschnitte het. Do isch mer grad glich, dassi wieder do bin. Stellet mer üs mol vor, bi 40 Grad ohni Küelschrank und ohni Klimaalag...nei danke. Denn lieber die verregnete 16 Grad wo mer do hend. Isch jo glich schöner zum schaffe wenns echli küehl isch und mer nöd mues veruse luege und denke, ach wäri doch ufeme Liegestuel miteme küehle Glas Trinke *träum*

Jedefalls, wett eu jo nochli was verzelle. I ha wieder agfange de Bodesee unsicher mache. Noch es paar coole Fun-Dives mitem einte oder andere Erlebnis hani mi as AOWD-Brevet gwooget. Noch es Bizli Theorie lese und bespreche hend mer di erste drüü Tauchgäng grad alli am gliche Nomitag gmacht. Navigationstauchgang isch de ersti xi. Noch es bizli Trocheüebig an Land im Wasser denn Flossezykle zelle, 20m Kompass Tauche, Viereck tauche, alles het ufs erste Mol klappet. Zweite Tauchgang Suchen & Bergen. Nordwest uf 7,5m Gegestand sueche - het doch au rasch klappet und mer hend en chöne berge. De letschti Tauchgang hend mer denn als Fun-Dive gmacht welli s'Nitroxbrevet jo im vergangene Johr scho gmacht han. Wommer uftaucht sind zum luege wommer sind, hend mer grad no 2 Kiffer verschreckt, was au immer die xeh hend, wo uf zmol zwei Persone usem Wasser lueget *hihi*

Da wär au scho meh wie dHälfti vom Brevet xi. Nöchst mol no Tüüftauche und Nackttauche äääh, Nachttauche. Fischli belüüüchte. Genau. Jo mol luege, hoffemer dassi inner Wuche scho AOWD-Taucherli bin :-)

Key West und s'letschte mol Tauche

De dritti Tag in Florida hend mer üs freighalte für en Usflug ganz in Süde: Key West. Ca. 1,5 Stund ein Weg mitem Auto zum de südlichste Punkt vode USA z’xeh. De Weg isch seeeeeeehr aspruchsvoll xi, nöd ei mol abbüüge, nu grad us, aber uh herzig: Inseli Brugg, Inseli Brugg, Inseli Brugg usw. Sind über de berüehmt 7-Mile-Bridge gfahre bis mer schliessli acho sind. Bi 95 Grad Fahrenheit, 35 Grad Celsius, sind mer denn Key West go erkunde. Es isch zudem so füecht xi, dass üs fascht us de Socke ghaue het. Zum Glück hets en Hufe chlini Lädeli kah mit Klimaalag:-) Hend de südlichste Punkt gfunde, zudem au en Lüchtturm und sus paar interessanti Sache. Ufem Ruckweg hend mer no welle is Turtle Hospital, leider sind mer aber z’spot dra xi sodass da nüme glanget het. Isch aber glich en schöneTag xi, au wenns echli zu warm xi isch.

De letschti Tag hend mer natürli nomol mit tauche verbrocht. Trotzdem dass zu 95%iger Wahrschinlichkeit Rege axeit xi isch unds scho am morge donneret het sind mer ufs Tauchboot – de Captian wird’s wohl wüsse:-) S’Meer isch sehr unruhig xi, d’Welle hends nöd ganz eifoch gmacht zum d’Usrüstig zämebaue. De Himmel isch immer dunkler worde. Uf eimol hend mer denn e Wasserhose entdeckt (Tornado ufem Wasser) was natürli sehr interessant xi isch. Nochher het sich den s’Wetter zum Glück echli beruhigt und isch nöd go regne cho.

De ersti Tauchgang isch dur en Hufe chlini Canyon gange wo mer grossi Muräne gfunde hend. Ufere Koralle het en Lobster sich zur Schau gstellt – er isch döte gsesse wines Fotimodell, schad hemmer kei Kamera debi kah. De zweiti Tauchgang isch scho bim abtauche interessant worde. Direkt under üs het sich en riesige Zackebarsch breit gmacht, das Tier isch sicher 2 Meter lang xi, ganz dick, wunderschö zum aluege. Er het sich nöd störe loh ab üs. Ufem Erkundigsweg hend mer denn no en grosse Stachelroche troffe und vili anderi schöni Sache. De Tauchgang isch en super Abschluss xi für üsi Feri und trotz dem Afangs schlechte Wetter, uh schön.

Morn machet mer üs uf de Heiweg und sind am Fritigmorge wieder i de kalte regnerische Schwiiz. Natürli hend mer no vil meh z’verzelle als do gschribe isch. I dem Sinn: Bis gli i de Schwiiz!

Tauchen und Miami

De zweiti Tauchtag het wie de ersti erst nochem Mittag agfange. Sind uf es relativ engs Boot packt worde, alles zämemache und schwupps is Wasser. Do mer gfunde hend, dass mer au ohni Guide tauche chönd, sind mer uf eigeni Fust lostaucht. Isch ganz en interessante Tauchgang xi und au de Zweiti het vil schöni Fisch parat kah zum xeh. Do sMeer a dem Tag ganz ruhig xi isch, hend mers total chöne gnüsse. Natürli hanis mol wieder nöd chöne loh ine Füürkoralle ine z’sitze, aber da simmer üs jo gwöhnt. So isch de Tauchtag ruhig verbi gange. Bim Obigspaziergang hend üs dMoskitos vil z’gern kah, sodass mer garantiert no en Moment a de 10minütig Marsch denke werdet (nu so kurz aber mind. 10 Muggestich:-))

De dritti Tag hend mer scho am halbi 9ni ufem Tauchboot agfange. Sind bi ruhiger See uf es chlises herzigs Schiff gange, wo mer wieder üsi Sache agfange hend zämeschruube. Het üs doch de Captain vorgwarnt, dass mer bi dem Riff liecht verlore got, hend mer welle guet ufpasse wos Boot isch. Aber noch 30min tauche hend mer beid gfunde, dass sBoot mues ine anderi Richtig si. Okay, uftauche, luege, abtauche, okay…witer. Wo blibt denn das Boot? Okay, wieder ufe, nöd guet, anderi Richtig. Nocheme Wili grad us tauche hend mer es Boot gfunde, aber das het total anderst usxeh vo une. Okay, nomol luege, wieder falsch. Wo mer entli bim Boot acho sind hend üs alli usglachet und nu no uf üs gwartet, guet dass mer üs immer so einig sind. Bim Zweite Tauchgang hend mer üs denn de Weg schöö gmerkt und sBoot immer im Aug kah. Defür alles andere nöd: D’Gruppe vor üs het 4-5 Adlerroche und en ca. 2m grosse Hammerhai xeh – wo mer echt higlueget hend? Überall nu nöd döt hii. Jenu, nöchst mol denn.

De Nomitag hend mer demit verbrocht dur de Verkehr uf Miami Beach z’fahre. Sind zwor 1,5 Stund xi ein Weg, aber het sich glohnt. Hend en wunderschöne Sandstrand gfunde. Echli Models bim Fotoshooting beobachtet und echli badet, simmer wieder retour – direkt in Firobigverkehr. Echt müehsam wenn denn dezue no sNavi meint mer söllet über e Brugg fahre wo abbroche worde isch? Hends denn glich no gschafft und sind in Key Largo am Obig ines feins Restaurant go esse. Fisch und Burger. Naja einigi Überraschige hets glich no geh – woni gfroget ha wasi grad für Fisch esse hets gheisse Dolphin?!?! Ehm jo, isch fein xi,… Nenei sött glob kei Delfin xi si, aber i weiss jo au nöd. Wie scho mol verzellt wäret mer wiedermol bide Kultur vode Amis…chum leit mer sBsteck ab wennds de Teller mitneh und zmittst wäret em Esse frogets obs Dessert dörfet bringe? Nuuu kei Stress!! Wommer denn de Guetschii für de Dessert, en berüehmte iheimische Limette Cake iglöst hend, hend mer en Limettemilchshake becho, au e Lösig:-) I dem Sinn, bis es witers Mol!

Akunft in Miami, Florida

De Flug vo Las Vegas uf Miami wär nöd jedermanns Sach xi. Bereits die erste Halbstund die Luft het sFlugzüg afange rüttle. Es het zwor ab und zue wieder ufghört aber au immer wieder agfange. Nebet dem het de Typ hinder üs so luut Musig gloset, dass mers e Reihe witervorne no kört hend. Als het da nebet em unbequeme Flugi nöd scho langet sind mer no ines riese Gwitter gfolge. Isch zwor interessant xi Blitz vo obe z’xeh, aber het au dementsprechend gschüttlet und grüttlet. Stunden spöter simmer denn acho in Miami. Hend d‘Uhr 3 Stund füre stelle möse und do demit isch dNacht verbi xi aber gschlofe hemmer natürli nöd.

Es witers Mol hend mer es Mietauto usgwählt. Dermol en echli chlinere Ford Escape, aber hend au nöd vor gross umezgfahre. Zum Hotel sind 5 Viertelstunde Fahrzit xi. Wommer acho sind hemmer grad en Kulturschock kah. Vom lebendige Las Vegas is usgstorbene Key Largo wos regnet wie us Kübel. S’Hotel het sich als Motel usegstellt und het nöd sehr iladend usxeh. Natürli sind am morge am 9ni kei Zimmer fertig also simmer id Tauchschuel und hend döte ichecket. De netti typ döte het üs denn echli Muet gmacht, aber isch schwierigxi z’glaube, dass sHotel für die Verhältnis do okay söll si, s’Wetter au schön söll werde? Jenu, no poste, was esse und retour go luege obs Zimmer fertig isch. Isches xi aber was für eis. Het öppert xeit dass mer ines Hamsterkäfig igsperrt werdet? Chas jo nöd si…und genau do söttet mer 6 Nacht blibe? Eieiei, de Lade isch üs immer witer abe. Hend denn halt Klartext gredet und echli üsi Lag erklärt, sodass de Herr vom Hotel uf zmol no es anders Zimmer zur Verfüegig kah het. Wonner üs das zeiget het hemmer trotz de Mehrkoste sofort jo xeit: E Wohnig mit Stube, Schlofzimmer, Kuchi und Bad. Hend üs ufgmacht in nöchste Lade und üs grad mit Esse ideckt, die Kuchi mues doch benutzt si. Ufem Foti xeht mer guet wie dAmis tüend ipacke, überhaupt kei Umweltbelastig:-) Noch über 36 Stunde wach si simmer denn guet igschlofe.

De ersti Tag hemmer mit schlofe und tauche verbrocht. Well üses Tauchboot abxeit het, sind mer zunere andere Tauchschuel verfrachetet worde. Hend üsi Tauchgäng z4te gnosse bi 28 Grad Wassertemperatur ade Oberflächi, 26 Grad uf 10m. Bim zweite Tauchgang hemmer wie immer zerscht chöne abem Boot jucke, warte, abtauche, abeluege und was isch denn da? En ca. 2m lange Ammenhai – geeeeeeillll! Er isch aber vil zschnell weg xi, aso hend mer üsen Tauchgang echli ruhiger gnosse. Natürli hemmer au en Hufe xeh aber de Hai isch scho grad s’Highlight xi:-)

Viva Las Vegas....au mit Verspötig

Vegas, entli isches losgange uf Las Vegas! Ufem Weg durd Wüesti isches immer wärmer worde. Sind mer doch bi ca. 10 Grad abgfahre, isches uf eimol 34 Grad. Scho vo witem hend mer di grosse Hüser vo Las Vegas entdeckt und dVorfreud isch g’stige. D’Ifahrt vom Hotel hemmer vor luter Verkehr ufs erste Mol verpasst aber denn doch no gfunde. Las Vegas isch nöd eifoch für so Landeier wie mer – find emol i dem Hotel wo sich „City“ nennt d’Lobby? Riese gross… aber hends denn doch gfunde. Kurz astoh, denn het üs die nett Dame echli komisch aglueget und mitteilt, dass mer en Tag z’spot dra sind? Was bitte schön söll da? De Voucher muess doch falsch druckt si? Oder s’Reisebüro falsch buechet? Hallo? Okay, rasch kombiniere…nehmet mer da Zimmer halt für ei statt für zwei Nächt. Im Zimmer hend mer mol alli Papier checket und taaaaaaatsächlich, mer hends spannender gfunde am Bryce Canyon go wandere go statt uf Las Vegas z’go, normal oder? :-) Ez isch au klar werum am 2te Morge in Bryce Canyon use Roomkey (Zimmerschlüssel) nüme tue het. Aber uf üsi Reklamation hi het üs de Receptionist üse Schlüssel eifoch neu glade statt üs z’säge dass mer nu für ei Nacht zahlt hend. Nöd mol bim Uschecke het öppert öppis xeit, hettet mer echt au e Wuche chöne blibe?

Jenu, ab ufs Zimmer, nomol ca. 20min retour zum Auto und wieder ufs Zimmer, e halbi Tagesreis. Aber wäret mer nöd scho gnueg müed noch 4,5 Stund Autofahrt hend mer sofort möse uf de Strip well üs ez uf eimol en Tag gfehlt het. Nu de Usgang vo dem Hotel z’finde, wie sött echt da go? Uiuiui, Landeier in Vegas. Vor luter Stuune hend mer s’Muul fascht nüme zuebrocht wommer entli die ganz Sach vo Nöchem hend chöne aluege. Hend jo scho öppe Föteli xeh, aber dass soo beidruckend isch? Sind de Strip abglaufe bi 36 Grad. Ufem Eifelturm isches au nöd küehler xi, aber e wunderschöni Ussicht. Nu wo isch ez die berüehmt Las Vegas Igangstafle? Mitem Fernglas hend mer si vom Eifelturm us xeh und hend au no döte hi welle. Als wäret mer nöd scho gnueg glaufe isches witeri 2km gange. Foti, Foti, Foti und wieder zum Hotel. Toooodmüed simmer acho noch 5 Stund laufe.

De Obig und de zweiti Tag hend mer vorwiegend im Casino verbrocht damit sGeld under dLüt chunt. Bling, Bling, Bling – isch sGeld weg xi und üsi Ziit im Las Vegas au scho verbi.

Jenu zum guete Glück hend mer nöd au no de Flug uf Miami verpasst, denn jetzt sitzet mer am Flughafe. Bis in Florida:-)

Willkomme im Wilde Weste - Brcye Canyon

Ufem Weg zum Bryce Canyon isches je länger je grüäner worde. Sind bis uf 2250m über Meer ufe gfahre. Hend ufem Weg soger e Autowäschalag gfunde wo in Betrieb isch, hend üses Auto richtig iseift, dass mer wieder besser usexehnd. Bim Canyon acho het üs sNavi ufen leere Parkplatz glotst und döte sött ez üses Hotel si? Naja, neu igeh – nomol probiere.....simmer bim Red Canyon glandet…wohl au nöd richtig. Aber alle guten Dinge sind drei, hend mer sHotel bim dritte Alauf gfunde, uh schö im Grüäne und vorem Zimmer grad en See, wunderschö glege.

Bim erkunde vom „Dörfli“ hend mer no Halt im Old Bryce Town gmacht, wos uh herzigi Shop, vorallem Rock Shops, het. I denne Steilädeli chönt mer sich stundelang beschäftige. Grad nebet zue hend mer denn en Rodeo Platz gfunde. Do hüt „Memorial Day“ isch, Gedenktag für Armeelüt wo im Krieg umcho sind, hends usnahmswis soger e Vorstellig gmacht, wo mer sofort Tickets postet hend. Kurz spöter isch au scho losgange, di erste Pferd sind gsattlet worde und nyyyhaaa, Rodeo gritte. S’einte oder andere Pferd het doch no e gföhrlichi Situation gschaffe. Nochher sind di junge Stierli cho wo vo jüngere Cowboys gritte worde sind. Gfolgt vo de ganz jüngste uf de Schöööfli – genial. Au wenn die Buebe kum hend chöne laufe, Schööfli rite hends chöne:-) Zum Schluss natürli no de Höhepunkt: Bullriding. Die grosse Stier hend scho die Boxe usgschlage und sich kum bändige loh. Wos denn los gange isch hends alles geh. Isch spannend xi zum zueluege und Föteli mache, bis denn aber en junge Burst under en Stier cho isch, nochher doch anschaulich ghunke het. Hoffemer isch nix schlimmers passiert. Zum Abschluss hend die ältere Cowboys no zeiget wie si Rindli mite Lassos ifanget, e super Kunst, wos total beherrscht hend. Isch en tiptope Obigabschluss xi und mer hend au nüme wiit retour kah is Zimmer.

Am nöchste Tag hend mer de Canyon besichtiget. Mitem Shuttlebus simmer an hinderste Punkt gfahre und nochher alles am Canyon noh retour gwanderet. Zum Glück hets nüme so windet wie au scho. Isch e schöni Wanderig xi dur ganz herzigi Waldweg. Hend en Hufe Eidechsli xeh, öppe mol es Chipmunks und sus chlini Tierli. Da isch üse letscht Tag xi im Grüäne usse, morn heisst denn

VIVA LAS VEGAS!

Lake Powell - See und Hike

De Weg vom Grand Canyon het üs no es Zitli am Canyon noh gführt und denn durd Wüesti. Het sehr vil rote Sandstei kah. In Lake Powell acho isch üses Hotel es witers Mol zimli abglege, defür direkt am See. Was chammer echt do zwei Täg lang mache?

Hend es witers Mol agfange Karte studiere und xeh, dasses interessanti Wanderige het und mer soger chan in Canyon ine go. Also sind mer uf Page, s’nöchste Dorf, scho fascht echli es Geisterdorf, aber mer hend döte e Hike-Tour für de nöchst Tag buechet. Am Morge am 8ti isches losgange, mite Wanderschueh in Richtig Anthelope Canyon. De Truck wo üs gfahre het, het mindestens bis uf 100km/h beschleuniget obwohl hine 10 Persone ohni Gurt, Schiibe oder sus was gsesse sind. Echli langsamer ischer denn mit üs durd Wüesti bis mer de Igang vom Canyon xeh hend. Wow, wow, wow, was üs erwartet he tisch sehr idrücklich xi. Die Stei, alli vode Fluet i di verschidene Forme gwäsche, sind i de Morgesunne wunderschön xi. Mer sind mitem Guide de ganz Canyon ine „ghicket“ resp. gwanderet. Er het üs denn verzellt dass im Summer de ganz Canyon gfluetet wird und scho mol e Tourgruppe umcho isch im Wasser. Also hemmer üs lieber rasch uf de Rückweg gmacht:-)

Mir sind nochher nomol selber ufe kürzeri Wanderig zum Horseshoe Blend – wies de Name scho seit macht de Canyon e Kurze in Form vome Hufiiise. Mer sind obe ade Klippe gstande resp. gsesse – es isch 600m id Tüfi gange ohni Haag und ohni Sicherig. D’Natur hets do nöd versäumt wunderschöni Skulpture z’mache. Hend no de Lone Stone aglueget und Füess echli in kalte See ineghebet. Vo dem Beach us het mer sehr schö de Boot, de Quad-Fahrer und de Jet-Ski-Fahrer chöne zueluege.

Die Amerikaner sind mengmol scho nöd ganz z’verstoh. Hauptsach si müend kein Meter laufe und chönd alles mitem Auto mache. Hend e Gruppe beobachtet wo de Hügel uf glaufe sind, wo aber au es Wägeli gfahre wär. Wo die liebe Lüt 5/6, jo er leset richtig 5/6 nöd ¾, glaufe sind hends gmerkt oh mer cha au fahre….und sind tatsächlich nomol de ganz Hügel abe glaufe damits mitem Wägeli hend chöne ufefahre :-)

Grand Canyon

Üsen lange Weg Richtig Grand Canyon isch richtig spannend xi, grad us, grad us und nomol grad us. Km durd Wüesti, en Hufe nix, 35 Grad und en Hufe Staub. Ca. die Hälfti hend mer üs denn gfroget, wo echt s’nöchste WC isch? Mit vil Glück hemmer e Usfahrt in Sand gfunde und hinder em dritte Kaktus rechts isch denn au sWC xi. Nur 20 Sekunde dur de Sand aber üses Auto het usxeh wie nocheme Sandsturm!

In Grand Canyon Village acho hend mer vor luter Wald d’Bäum nöd gfunde. Er het es paar chlini herzigi Hüsli zwüschet de Tanne kah aber wo bitte es Hotel? Hend dLobby denn mol gfunde und sind mite Roomschlüssel no es paar Krützige witer gschickt worde – wo mer denn zMittst im Wald wo Füchs und Hase enand guet Nacht säget üses Zimmer gfunde hend. Isch so schö abglege dass mer vorem Zimmerfester ab und zue soger es Reh hend wo inelueget:-)

Zum Grand Canyon chammer nöd vil säge: Wunderschö, riese gross, gigantisch und einzigartig. Mer hend e Wanderig am Canyon noh gmacht, sind am und zue wieder es Stückli mitem Shuttlebus gfahre und sind so wiit wies gange isch glaufe. D’Kulisse mitem Colorado River isch vo jedere Site schöner zum aluege. Ab und zue es Reh oder es Eichhörnli resp. Chipmunks, het überall spannendi Sache zum xeh kah. Hend ganz vil Föteli gmacht und die ruhige Täg am Grand Canyon gnosse.

Palm Springs bi knapp 40 Grad

Es isch a 2stündigi Fahrt ine Stadt ohni vil wenn und aber axeit xi - Palm Springs. D'Fahrt isch tiptop xi und je nöcher mer cho sind desto wärmer isches worde. Im halb Stund entfernte Outlet-Zenter isches scho warm aber no einigermasse agnehm xi. Wommer denn in Palm Spring hend wölle zum Auto usstige hets üs fascht hinderschi usegnoh - es het ca. 36°C kah.

Nochem Hotelbezug hend mer üs trotz de Hitz vorgnoh de Huushalt z'erledige, wäsche, poste, ufruume.... Genau, mer hend üs rasch im Internet erkundiget, hend dWösch packt und sind e Laundroma go sueche. Hend die Wäscherei au gli gfunde. Zum Glück het üs de netti Herr wo döte gschaffet het echli gholfe, sus hettet mer wohl kaum usegfunde wie die Grät funktionnieret, er het sich köstlich ab üs amüsiert :-) Rasch go poste ide Zwüscheziit und retour, isches nonöd fertig xi. Aber s'Warte het sich als gar nöd langwilig usegstellt, well sich üs en junge Herr vorgstellt het und üs agfange het sini Lebesgschicht verzelle. En iheimische Tattoowierer mit Studio wo sus nochli am Physik studiere isch - ganz e spannends Gspröch xi. Okay, ganz normal isch de gueti Herr nöd xi, er het üs denn Fotis und Videos zeiget, wonner sich vor 3 Woche mit Kollege a Iisehööge anen Baum ghenkt het, Iisehööge am Rugge, eifoch id Huut, ähm jo?

Uf de Rückfahrt simmer denn no inen andere Lade go poste damit mer für di mornig 7,5 Stunde Fahrt au guet usgrüstet sind. Do hets mengmol Strosse wommer umgrechnet runf 80km/h fahre cha und denn chunt eifoch es Rotliecht - isch üs hüt zum Verhängnis worde. Bim rasche bremse het sich nemli d'Küelbox mitem mittlerwile uftaute IIis selbstständig gmacht und das Wasser het sich im ganze Auto verteilt. Guet isches do gnueg heiss dass tröchnet :-)

De Obig hend mer no miteme feine Znacht im Steakhouse verbrocht, es isch kurz vorem 10ni immer no wiit über 20 Grad xi do. Zum Glück isches nöd immer so heiss.

San Diego Downtown, Busfahre und Sea World

In San Diego acho hend mer üses schöne Hotel mit ganz vil Grüepflanze, Papageie, Koi-Fisch, Entli usw in Bezug gnoh. I dä Schwiz sind mer jo ger kei ÖV-Fründe, aber do hemmer gfunde isch sicher bequemer und spannender wenn mer de Bus nehmet zum Downtown go aluege. Aso hend mer rasch Karte studiert, Fahrplan aglueget und sind wieder losglaufe. Hend 3-4x möse Karte studiere bis mer en Bus mit de richtige Nr xeh hend – rennrennrenn – ine, losfahre. Ehm, okay no zahle und bim zahle säge wos hii got, do meint de Busfahrer dasser ger nöd i die richtig Fahrt. Suuuuuper, usstige. Retour laufe. Andere Bus neh, okay, Bus fahre. Hends schlussentli au no gschafft und echli dStadt San Diego erkundet. No USS Midway aglueget, riesig gross wie si isch. Irgendwenn hend mer retour welle aber kei Bushaltestell meh gfunde. Okay hemmer 2 Haltestelle de Zug gnoh und denn de Bus. Im Bus het e Frau ase Freud kah ame Baby, dass sie de ganz Bus unterhalte het – mer hend Träne glachet. Usxeh het si wie useme Horrorfilm. Schlussentli simmer recht müed retour is Hotel cho.

En Tag spöter isch entli s’lang ersehnte Sea World ufem Programm gstande. De Wetterbricht het nöd allzu warm und bedeckt. Rasch wieder Busplan studiert wieder losglaufe, wieder uf de Bus. Rasch mitem Busfahrer gspröchlet damit mer sicher as richtige Ort chömet, simmer abgfahre und gli döte xi. Natürli wieder i di falsch richtig glaufe, aber de Busfahrer het üs denn no’ghuupet und zeiget wo mer müend durelaufe.

D’Entdeckigsreis Sea World cha losgo. Delphin, Orcas, Pinguine, Iisbär, Wiiswal, Seehündli, Schildkrötli, uuuh vil Haie und no vil meh hemmer xeh. Natürli hets au en Hufe Fischli kah, aber alli so chlii, bim Tauche sinds amel schöner. Bide Shamu-Show (Orca) die bide erste ca. 10 Reihe gstande dass mer chönt nass werde. Voller Vertraue simmer aber glich i di ca. 6sti Reihe gsesse und vor üs hends agfange Regeschütz alegge. Nenei wer wett denn au so wiit sprütze? Killerwal sind cho, hend Kunststückli zeiget, is Wasser gjuckt und het chli gsprützt. Aaaaaaaaber denn isch losgange, d’Wal hend mite Schwanzflosse wunderbar chöne Wasser katapultiere, die Lüt die vordere Reihe sind pitschnass worde. Mir zum Glück nöd, aber isch es lustigs aluege xi:-) Alli Show’s sind sehr idrücklich xi und uh schöö, isch nu zum witerempfehle. De Tag isch so interessant xi dass mer d’Sunne wo cho isch kum gmerkt hend und am Obig beidi zimli roti Arme übercho hend. Het mer doch am morge ger nöd denkt? :-)

L.A. Universal Film Studios

Am letschte Tag in L.A. hend mer en Usflug id Universal Film Studios planet. Warm alegge hend mer üs nöd möse, am morge isch scho agnehm xi. Mite Metro zwei Statione, uf de Shuttlebus und innert 15min simmer döte xi-  am Morge früe wo d’Studios erst grad ufgange sind. Wie empfohle hend mer üse Rundgang mite Studio Tour agfange. 3D-Brille id Hand simmer innen Bus volle Chinese ipackt worde. De Bus het üs denn a di verschidene Filmkulisse brocht, di verschidene Utensilie sind erklärt worde. Ide Stadt wo Desperates Housewifes drüllt wird hemmer au e Rundfahrt gmacht, aber au in Jurassic Park, spannend xi...D’Speakerin het de ganz Weg kommentiert und s’erste Mol hend mer gfunde, chönts au biz lisliger si? Bim KingKong 3D-Erlebnis isch de Kampf scho i de erste Sekunde losgange und mir z’mittst ine. Ab und zue em KingKong sin Schweiss is Xicht becho isches denn witergange und nochere Stund fertig xi. Uf de Film xeht alles so spektakulär und echt us und in Wirklichkeit isch alles vil chlinner, vil us Karton oder eifoch improvisiert, aber sehr guet improvisiert.

Denn sind mer selber di einzelne Shows go luege: Simpsons, House of Horror, Terminator, Shrek usw. Es het nöd ei Vorstellig kah wommer nöd nass worde isch und jedi isch lüter xi wi di ander, mer het sis eige Wort teilwis kum meh verstande. Ob die echt alli nüme so guet köret do? Es isch erklärt worde die Animationsfilm gmacht werdet, aber au d’Achterbahn het nöd gfehlt. Um de Mittag ume isches denn 31, gfühlti 33 Grad warm worde und mer hend kum meh möge ade Sunne laufe. No di letschte Show’s gnosse und es paar mol interessiert driglueget. Noch 6 Stund laufe laufe und luege hend mer üs denn uf de Retourweg gmacht.

Ufem Retourweg, de wommer scho mindestens 5x glaufe sind i denne 3 Täg, laufet mer immer a de zwei gliche Sache verbi  - en Penner wo de ganz Tag am gliche Ort sitzt….und en Typ wo de ganz Tag sini Fahne schwingt damit d’Auto bi ihm parkieret. Do chöntet mer üs no es Vorbild neh, mer henket es Schild ane Strosselaterne und guet isch. Do chunt es Manndli es Schild um de Hals über und en Fahne id Hand und scho het er en Lob für de ganz Tag, da nennt mer Arbetsbeschaffig :-)

Morn gots denn witer, 4,5 Stund Autofahrt noch San Diego!

L.A. Downtown, Beverly Hills und Santa Monica

De Zweiti Tag i de Stadt vo de Engel hend mer guet planet, hemmer amel gmeint – Downtown isch ufem Plan gstande. Hend es paar hochi Hüser erwartet, paar schöni Shops für Souvenir und vil meh hend mer nöd i üsne Erwartige kah. Sind ca. 15Min zude Metro glaufe, Ticket glöst was gar nöd so schwierig xi isch und mol igstige. Anegsesse und gwartet bis mer döte sind – oder so. Isch üs doch uf ei mol ufgfalle, dass mer fascht elei sind i dere Metro, heisst echt Union Station doch nöd Hauptbahnhof? :-) Okay, so rasch wie möglich us dem Ding use und tatsächlich simmer am Zil verbi gfahre. Immerhin simmer direkt vor de grösste Gebäude gstande und hend zimli gstuunet.

Okay, retour laufe nu wo isch retour? Hend e Stund demit verbrocht irgendwas z’finde wommer suechet aber irgendwiä hets nu zimli dreckigi und kaputti Strosse kah. Guet was chönd mer mache ussert laufe, laufe und nomol laufe? Hmmmmm…. An der nächsten Ampel, steht ja schon die nächste… Polizei – frogemer doch die wo mer cha shoppe? De netti Herr het üs denn de Bus empfohle aber xeit wommer müend durelaufe, was mer au gmacht hend. Aber würkli besser isches nöd worde. Sind soger no ime Viertel glandet wommer üs vorcho sind wie ufem Spanische oder Mexikanische Markt, denn hemmer nuno so rasch wie möglich retour welle. Noch guet 3 Stund Marsch simmer denn wieder retour xi und scho wieder total müed.

Nochere kurze Pause hend mer sAuto gnoh und sind los richtig Meer. Hend de Weg über Beverly Hills gnoh zum nochli d’Villene go aluege., het no möse si. Isch aber "meh Schein als Sein" xi, het wohl es paar herzigi Hüsli resp. Villene kah, aber da isch au scho alles xi. Sind denn witer noch Santa Monica wommer nocheme Parkchaos en Platz gfunde hend und de schö Strand gnosse hend. Xeht würkli us wie in Baywatch soger mitem Lifeguard-Hüsli. Es het tatsächlich Lüt kah bim Bade, d’Wassertemperatur isch mit 16,6 Grad (umgrechnet) agschribe xi, bbrrrrr…. Nochere Pause im warme Sand simmer no uf de Steg, nochher no i di 3th Promenade echli go schlendere und esse. Innert ere kurze Ziit isch Temperatur aber um gfühlti 10 Grad retour sodass mer zimli bald wieder richtig Hollywood gange sind zum de Obig ide Wärmi usklinge z'loh.

L.A. Hotel, Hollywood und Madame Tussaud

Ufem Weg noch Los Angeles het dAutobahn ei Spur ade Andere meh becho bis schlussentli 6, 7 Spure xi sind. Noch ere halb Stund Stau simmer zMittst im Kueche acho – Hollywood! Im Hotel acho zerscht was zMittag esse bevor mer s’riesige Zimmer bezieh hend chöne, riesigs Bad, zwei riesigi Better und mit Kuchi inkl, Microwelle. Nochere kurze Pause sind mer uf go Hollywood erkunde.

De Walk of Fame het nöd lang uf sich warte loh, ein Stern am andere hend mer aglueget und sind ufe und abe glaufe. I dere Stadt hets no meh Obachlosi wie in San Francisco und döte hets üs scho vil dunkt… Do wäret denn no die Fuessgängerstreife – a jedem Ecke. Zerscht mues mer aber no merke dass mer jede Zweiti mues miteme Knopf aktiviere. So sind mer doch es paar mol 2, 3 Minute döte gstande und hend ufs „laufe“-Zeiche gwartet und nüt isch passiert :-) Je witer mer glaufe sind desto interessanter isches worde – Theaters, Kodak Theater, Hollywood Guinness World of Records, Madame Tussauds Museum… Madame Tussauds Museum? Da hend mer welle gnauer xeh! Nu grad wommer ine hend welle het Digicam gfunde, si seg volle und zudem de Akku leer, was üs echli en Strich durd Rechnig gmacht het. Okay, rasch ade berüehmte Hand- und Fuessabdrück verbi, de vile Gaulker echli zueglueget und retour is Hotel go Batterie hole.

Natürli hend mer ez de ganzi Weg nomol müese laufe was doch ca. 40min zum Laufe isch ein Weg. Wieder acho bide MadameTussauds sind mer dermol grad ine gstüüret. Im erste Moment het mer grad nüme gwüsst wer ez echt und wer sich nöd bewege cha – total echt gmacht. Mir hend üs guet chöne vergnüege, alli mögliche Pose usprobiere und über 100 Föteli mache. Noch dem Bsuech sind mer denn total uf de Felge xi und hend de Weg retour is Hotel in Agriff gnoh.

Di erste zwei Etappe

De Weg uf San Simeon het sich echli als anderst usegstellt als mer denkt hend. Es isch e Berg und Tal Fahrt worde, rechts links, rechts links. En alte echli suspekte VW mit 3 junge männliche Insasse het sichs nöd neh loh echli vor üs her zfahre, langsam und gmüetlich. Nochdem mer ihn ame günstige Ort hend chöne überhole isch er denn hinder üs gfahre. Da isch au so lang guet gange bis mer hend möse bremse – quietsch quietsch, er het nüme chöne bremse und innert Sekunde ischer nebet üs gstande, zum Glück hend mer en nöd möse uf Knü neh. De Rest vom Weg isch denn ruhiger xi, hend no e Kolonie Seehündli xeh und di schöön Gegend gnosse.

Früe am Morge isches hüt losgange richtig Santa Barbara. D‘Stross isch dermol einiges grader und besser xi zum fahre. In Santa Maria hend mer Zwüschehalt gmacht und en Salot gesse. Bim Esse isch üs ufgfalle das im Friedhof uf de andere Strossesite mite Auto durefahret – ob mer das echt au chönd? Hends usprobiert und tatsächlich isches normal, mitem Auto dur alli Wegli zfahre. Do isches glaub sowieso snormalste vode Welt jede Schritt und alles mitem Auto zmache.

Acho in Santa Barbara sind mer no uf de riese gross Steg useglaufe wo mer sött Wal xeh. Tätsächlich hend mer wiit usse Seehündli entdeckt und bim Beobachte sind uf zmol ganz vil Delfin verbi zoge, es wunderschös luege xi. Spöter müend mer no dIkaufsmeile go erkunde, bevors denn morn los got richtig Los Angeles!